عصام مرعب: مافيات الإنتاج أكلونا… وهؤلاء مش قاطعين من حَد التمثيل!
بحلقة سقفها عالي كتير، الممثل اللبناني عصام مرعب بيفتح قلبو بحوار شفّاف وصريح مع رنا أسطيح بهالحلقة من برنامج “ما بتقطع” وبينتقد مافيات الإنتاج والاحتكار بمجال التمثيل بظل تكرار نفس الوجوه بمختلف الأعمال وحجب الفرص عن أصحاب المواهب والاختصاص. وبتصريح مفاجئ بيكشف عصام كواليس أحد الأعمال اللي تلقّت خلالو ممثلة جميلة عرض مشبوه للمشاركة بعمل بارز، وبينتقد بقوّة الفرص الممنوحة لجميلات ما بيعرفوا يمثلوا. عن دور حياتو بيحكي عن دور منحرف بعمل سينمائي ضخم شارك فيه صنّاع بمستوى هوليوودي، وبيكشف عن سبب عدم عرض الفيلم. أما عن أعمالو الجديدة فبيفصح عن مشاركتو بمسلسل جديد بعنوان دهب غالي الى جانب نجوم من لبنان وسوريا. وبالحلقة بيأكّد عدم اقتناعو بالدراما المشتركة واعتبارها لا تجوز فنياً وبيعترف انو مشاركتو فيها كانت لاسباب مادية. نجل الفنان الكبير آلان مرعب وابن شقيقة الراحل الكبير روميو لحّود بيفتح النار على المجتمع اللبناني وبيعبّر عن نقمة وغضب كبير إزاء عدم التفاف اللبناني حول الشخصيّات الناجحة. وعن أصعب موقف مرق فيه بحياتو بيكشف انو كاد يفقد ابنو بسبب وضع صحّي خلاّه يتوقّف عن التنفّس وبيعبّر عن مدى الخوف اللي تملّكو قبل ما يتخطّى الطفل محنتو الصحيّة. وبالأسماء بيعطي عصام رأيو بالنجوم الموجودين عالساحة وبيعتبر انو النجم السوري معتصم النهار ما بيقنعو كممثل بينما بيعترف بانو النجمين عبد المنعم عماري و جمال سليمان مدرسة وبحر من العلم. وبالسياق، بيحكي عن تعاونو مع النجوم مكسيم خليل ستيفاني عطالله داليدا خليل سينتيا خليفة وغيرن وبيوجّه رسالة مباشرة للمخرجين بلبنان. مين الممثلين اللي طلب منهم يقعدوا ع جنب؟ شو الموضوع اللي طالب الدراما اللبنانية بطرحو؟ وشو الفيلم اللي ندم على مشاركتو فيه؟ كل هالأسئلة وغيرها بيجاوب عليها بكل جرأة النجم عصام مرعب بحلقة نارية من برنامج ما بتقطع مع رنا أسطيح عبر منصة هنا لبنان.
