ليليان نمري لبيار جامجيان: “يا ريت صوّرت معَك المشهد اليوم… حرقتلي قلبي”!
ودّعت الممثلة القديرة ليليان نمري صديقها الممثل القدير بيار جامجيان الذي رحل صادماً كل محبيه والوسطين الفني والإعلامي في لبنان.
ونشرت نمري صورة مع جماجيان علّقت عليها معبّرةً عن حزن كبير في داخلها برحيله، فقالت: “إلتقينا بعد سنين وتركتنا بغمضة عين هالمرة ما رح قول شي إلا الصدمة اكبر من توقعاتي يا ريت للَحقت صورت معك هالمشهد الباقي ويا ريت قبلت عزيمتك عالغدا لو عارفتك فالل.. بخاطرك يا رفيق النجاح من ايام شبابنا.. بخاطرك بيبيرو والى اللقاء بالملكوت ورح نرقص رقصتنا الشهيرة وتعَيط عليي من غيرتك.. الله يرحمك حرقتلي قلبي”.
وخصّت نمري أيضاً جامجيان بمجموعة من الصور والرسائل التي نشرتها عبر خاصية “ستوريز” على “إنستغرام”. وقالت: “الفنان ما بيموت، بيتخلّد بأعمالو ورسالتو بالحياة. الفنان الحقيقي الوجه الأصيل لوطنو بكل بلاد العالم. الفنان المبدع بيبقى بقلوب الناس لتخلص الدني الله يرحمك بيبيرو”.
وقالت في منشور آخر: “يا ريت صوّرت معَك المشهد اليوم ونزلت فيي مسبّات. يا ريت التقينا ورجعنا اتغدّينا سوا. يا ريت قعدنا تحت هالشجرات وبلّشت تحلل بالسياسة وإتحمّل وإسكت. يا ريت غيّرت تيابك وأنا بالأوضة وبرمت وجّي وصار يضحك نضال وتشقّعلو يا مهضوم كانت لابقتلك الحياة. الله معك وليوم الملتقى منحكي ومنضحك”.
وأضافت: “كل ما تركنا رفيق عمر وزميل مهنة ورفيق بالروح والعطاء بحس البركة عم تخف. مش قادرة إسمع خبرموت ولا حابة نخسر حدا من هيك. من هيك كل يوم بقول ما حدا بيعرف شو مخبالو بكرا ولولا رجائنا بالقيامة وقوة إيماننا كان الحزن قتلنا. يا كل اللي بقلبكن كراهية وحقد كلنا رايحين. حِبوا سامحوا عيشوا. نوعا بقا”.
