طارق سويد كنت بجهنّم ورجعت .. وأنا اليوم في أسعد مرحلة من حياتي!

بمقابلة مليانة مفاجآت ومواقف مؤثّرة، وبأوّل اطلالة إعلامية لإلو من بعد غياب، الكاتب اللبناني طارق سويد بيكشف لبرنامج “ما بتقطع” عن سبب غيابو لأكتر من سنتين وبيفجّر حقايق كتيرة عن الصحة النفسية وأساليب العلاج اللي اتبّعها. بشفافية مطلقة بيحكي عن المرحلة اللي وصفها بـ “جهنّم” وكيف قدر يتخطّاها، وبيوجّه رسالة قوية لكل الأشخاص اللي بتعاني من الاكتئاب وتحية لكل الأصدقاء الفنانين اللي اعتبرن متل عيلتو. ولأوّل مرّة بيحكي عن مسلسل لبناني جديد عم يحضرلو وعمل عربي مشترك لإحدى المنصات بالإضافة لعمل مسرحي رح يتناول فيه بقوّة موضوع الصحّة النفسية. ولأوّل مرّة بيكشف انو لمّا كتب مسلسل بالقلب كان متوقّع انو البطلين ينغرموا ببعضن بالحياة كمان وشو كانت ردّة فعلو لما أعلنوا سارة أبي كنعان ووسام فارس عن قصة حبن؟ وبالحلقة بيحكي طارق عن مشوار الكفاح والبدايات والجملة اللي قالها وعملت منّو بطل بمسلسل للراحل مروان نجار . ليش اعتبر مسلسل كريستال مكسّر الأرض وشو قال عن الممثلين اللبنانيين؟ شو كان رأيو باعمال متل مسلسل 2020 و للموت والنار بالنار ؟ شو قال عن الكاتبة نادين جابر وليش حبّ نصوصها؟ شو سرّ تمسّكو بالدراما اللبنانية؟ وشو الموقف اللي جمعو بالكاتبين منى طايع وشكري أنيس فاخوري ؟
وبالحلقة بيكشف لاوّل مرّة عن كواليس اتصال جرى بينو وبين لمى الصبّاح وبيأكد بالمقابل انو علاقتو بالنجمة ماغي بوغصن بعيدة تماماً عن الشغل وهي أقرب فرد من العيلة بالنسبة لإلو. وفي حال كان مخيّر بين شركتي الصبّاح و ايغل فيلمز لانتاج مسلسل لإلو، مين بيختار؟ بالإضافة لآراء ومواقف كتيرة جمعتو بنجوم وزملا متل رندا كعدي و كارمن لبّس ووسام صبّاغ ريتا حايك وغيرن.
ليش قال أنا اليوم مش مستعدّ كون أب. وليش المساكنة بتقطع والزواج ما بيقطع بالمرحلة الحالية.
وشو الموقف اللي قال عنو هيدا أجمل شي صار بحياتي؟ كل هالأسئلة وغيرها الكتير بيجاوب عليها طارق سويد بهالحلقة من ما بتقطع مع رنا أسطيح عبر منصة هنا لبنان …