“شفت الموت ورجعت”… نوال كامل تتحدّث بجرأة عن تجارب الألم والأمل بين الشاشة والحياة!
بحلقة من القلب للقلب، بتحلّ النجمة اللبنانية نوال كامل ضيفةً على برنامج ما بتقطع مع رنا أسطيح وبتحكي عن النجاح الاستثنائي اللي حصده مسلسل بالدمّ بالموسم الرمضاني الماضي وعن خصوصيّة شخصيّة فدوى اللي علّمت وتركت أثر كبير بقلوب الناس.
وبالحلقة بتستعيد النجمة اللبنانية محطات بارزة من مشوارها الفنّي والإنساني وبتستذكر تجارب ألم وأمل ونجاة كانت فارْقَة بحياتها وكانت درس كبير بالتفاؤل والإيمان.
ليه قالت أنا شفت الموت ورجعت عالحياة؟ شو قصّة التجربة الروحانية اللي اختبرتها؟ كيف بتستمدّ قوّتها وإيجابيتها بالحياة؟ وشو العبرة من التجارب الصعبة اللي قطعت فِيُّنْ وكيف حوّلتُن لمادة للابداع والتميّز؟
مين هنّي المخرجين يلي عِرفوا يطلعوا منها ممثلة “غير”؟ ليه اختارت فيليب أسمر ورامي حنا تحديدًا؟ وشو سر إعجابها بنصوص نادين جابر وشو قالت عن قلم منى طايع وكلوديا مارشليان وطارق سويد وكارين رزق الله وغيرُن من الكتّاب اللي اشتغلت نصوصُن؟ مع مين لاقت حالها، ومين ما بيشبه عالَمها؟
نوال كمان بتحكي بصراحة عن مواضيع بعد في ناس بتخاف تفتحها:
من الزواج المدني للمساكنة والإجهاض والتبني وصولًا لموضوع التبرّع بالأعضاء بعد الموت…
شو قالت عن كاست بالدمّ؟ وبشو تميّزوا نجومه متل ماغي بو غصن وبديع أبو شقرا وباسم مغنية ووسام فارس وسينتيا كرم ومارلين نعمان وجوليا قصار ورفيق علي أحمد وغبريال يمين وسمارا نهرا وغيرن؟ وليه برأيها “ما حدا رحم الممثل بلبنان…”؟
كل هالمواضيع وغيرها كتير بتتابعوها بهالحلقة من ما بتقطع مع رنا أسطيح عبر منصة هنا لبنان واللينك بالبايو والستوريز.
